Каб заканадаўча апраўдаць рэпрэсіі. Палітолаг Пётр Рудкоўскі пра закон аб экстрэмізму

Учора наўздагон раней падпісанаму закону «Аб недапушчэнні рэабілітацыі нацызму» быў падпісаны закон «Аб змяненні законаў па пытаннях процідзеяння экстрэмізму». Яны ўступяць у сілу праз месяц пасля публікавання.

З новага – у заканадаўстве з’явяцца паняцці «экстрэмісцкае фарміраванне», «экстрэмісцкая сімволіка і атрыбутыка», а потым будзе створаны спіс экстрэмісцкіх арганізацый, ІП і грамадзян. Суд зможа разглядаць справы аб прызнанні атрыбутаў або арганізацый экстрэмісцкімі максімум на працягу месяца.

– Такія законы абумоўлены крызісам легітымнасці дзеючай улады. Сёняшнее кіраўніцтва зыходзяць з таго, што рэпрэсіі прыйдзецца прымяняць яшчэ доўга, таму ім мусіць існаваць нейкае заканадаўчае апраўданне, – каментуе сябра КР Пётр Рудкоўскі.

Палітолаг лічыць, што дзеючы прэзідэнт наўмысна чакаў даты 14 мая, бо на яе прыпадае гадавіна ініцыяванага ім рэферэндума 1995-га года з пытаннямі аб змяненні дзяржаўнай сімволікі.

– Самі законы яўна напісаны не юрыстамі, а сілавікамі, што будзе спараджаць пастаяннае напружанне ўнутры праваахоўнага сегменту, нават з улікам усіх магчымых чыстак і «тэстаў на лаяльнасць», – упэўнены эксперт.

‍